कश्मीर

काही रिकामी घरं
काही ओसाड गाव
एक दरी रोज पेट घेते
कश्मीर तिचं नाव

दऱ्यांत घुमतो आक्रोश
बर्फ़ात साकळताना रक्त
बंदूका ग्रेनेड धडाडू लागतात
आपण बातम्या पाहतो फ़क्त

कुणाचे राजकीय चोचले
कुणाचे राष्ट्रवादी अहंकार
झेलमच्या गर्भात उठलेला
कधी थांबेल हा संहार?

हातात मुलाचा फ़ोटो
चेहऱ्यावर हरवलेला भाव
एक आई दररोज घेउ पाहतेय
हरवलेल्या अर्भकांचा ठाव

बॅचलर्स

घरभर पसरलेला सिगरेटचा वास
हॉलमध्ये वाटीत पाणी घालून बनवलेले ऍश ट्रे
ओल्ड मॉंक किंगफ़िशर इत्यादी वगैरेच्या बाटल्या
सोफ़्याच्या फ़टीत रुतलेलं फ़रसाण
तंदूरीची हाडं
प्लेटवर सुकलेली ग्रेव्ही
त्यात चरणारी झुरळं
कवितांची काही पानं
पलाशचं "माएरी" आणि पियूषचं "हुस्ना"
आपल्या तारांवर प्रसवत कोपऱ्यात पडलेलं गिटार
रुममध्ये आडवे पडलेले बॅचलर्स
रुटीनच्या नाकावर टीच्चून
जागवलेली एक रात्र.....

पॅलेस्टाईन

तिथे निरागसतेचा खून चाललाय

इथे त्या रक्तसंहाराचं समर्थन चालू आहे

निष्पाप जीवांच्या मरणावर टाळ्या पिटणारी येडझवी मानसिकता

कुठल्या जिहादापेक्षा कमी नाही

आपलं आयुष्य पोकळ म्हणून

दुसऱ्यांच्या दु:खात सण शोधणाऱ्यांना

जेव्हा आपल्या गांडीखाली पेटलेल्या सुरुंगाची चाहूल लागेल

तेव्हा दुसऱ्या बाजूला पॉपकॉर्न घेऊन तुमचंही मरण एन्जॉय केलं जाईल

आणि तुम्हाला मारणारे किंवा मरु देणारे लोक तेच असतील

ज्यांचा आजपर्यंत तुम्ही उदो उदो करत आला आहात

तोपर्यंत चालू राहू द्या तुमचे अखंड राष्ट्रांचे जिहाद

आणि मध्यमवर्गीय कोशातलं कुजकं जगणं

कारण इतिहासापासून धडे घेतले नाहीत

तर तो परत जगण्याचा शाप इथे प्रत्येकाला मिळालेला आहे