उदेत्या सूर्याक केले सलाम
जन्माक घातले शेकडो गुलाम
शेण लासून केल्लो गोबोर
तोणाक फासून पुजले राम
विटाळाचे खाल्ले पाव
कमराक बांधले सगळे गांव
घामान पिकयल्ल्या धर्तीचेर
बाण तोपून केले घाव
पिंजऱ्यान घालून पालयली रात
दिवजां पेटोवंक दिली वात
पालखेफुडें नाचयल्यो दिवल्यों
कुंटणखान्यान लिपयली जात
अध्यात्माची धापली कूड
लासले गडे पेटोंवन चूड
देवचारांचे चोरून रोंट
हुबयले देव मारून बूड
स्वातंत्र्याचे गांवपाक गोडवे
एकठांय आयले सगळे बडवे
रक्त शिपून माखली कापडां
मनोवपाक सक्तीचे गुडीपाडवे
उभाल्ल्यो गुड्यों कापले फीत
साणिल्ल्याक दान म्हणपाची रीत
उभे आडवे मेळून गायता
साडेअठ्ठावीस बामणांचे राष्ट्रगीत
No comments:
Post a Comment