Tuesday, June 21, 2016

भिंती

घरभर भरुन राहिलाय 
फणसाचा वास 
आणि आशाळभूतपणे बघतायत 
काटेरी परिपक्वतेने 
गुदमरलेल्या भिंती..

Friday, June 17, 2016

जाऊदेत...

आपण दोघं जर
दोन वर्षांपूर्वी
किंवा पाच वर्षांनंतर भेटलो असतो
तर सगळं जुळूनही आलं असतं कदाचित
तू माझी नखं रंगवली असतीस
मी तुझ्या पाठीवर
कविता गोंदल्या असत्या

जाऊदेत...
अश्या क्षणी
नशीबाला दूषण देण्यापेक्षा
एका अशाश्वत प्रेमाचं
अधुरं वचन देशील?

Sunday, June 5, 2016

उत्कट

तुला तुझ्या आवेगासकट
कवेत घेताना
मला माझ्या अपूरेपणाचा अंदाज
येत राहतो
कसं जमतं तुला
सतत एवढं उत्कट राहणं?

Thursday, June 2, 2016

किंवा कसंही...

चल ना डेटवर जाऊ 
डिनर करु दारु पिऊ
your place or mine ते ठरवत
मेक आउट करु
अशी जन्मांची ओळख वगैरे नसताना
घट्ट बिलगून झोपू
क्षणिक सहवासाचं थ्रिल आणि reassurance 
एका तपाच्या कमिटेड रेलशनशिपपेक्षा अधिक वाटेल
असं काहीतरी करु
सकाळी उठून awkward स्माइल्स एक्सचेंज करु
मिठी सोडवू
खाली जाऊन ब्रेकफास्ट/ब्रंच करु
बिल येइपर्यंत शांत राहू
मी ओला कॅब  मागवीन
तू त्यात बसून घरी जा
जाताना गुडबाय hug
फोरहेडवर किस दे
पब्लिक प्लेस असल्याने
स्मूच टाळू
कॅब  ज़रा पुढे गेल्यावर
'चलो एक बार फिर से'ची यूट्यूब लिंक
तू मला व्हाट्सएप्पवर पाठव
मी 'I love साहीर' असं रिप्लाय करीन
मानेवर उठलेली हिकी फेड होईपर्यंत
आपण शक्यतो बोलूया नको
किंवा कसंही...

Sunday, April 24, 2016

देशभक्तिपर...

(1)

ऑफशोर कंपन्यांच्या डेस्कवर बसून
व्हॅलीची स्वप्नं रंगवीणाऱ्या
नीओलिबरलीझमच्या भडव्यांकडून
देशभक्तिपर प्रवचने ऐकायला
क्यूट वाटतं

(2)

पुण्यात 'आईची जय' हि शिवी आहे
आणि 'भारत माता कि जय'
हि देशभक्तिपर आरोळी आहे

ह्यातला फरक आणि साम्य
जेव्हा लक्षात येईल
तेव्हा दोन्ही उच्चारणे बंद करावी
कळावे
लोभ असावा

Wednesday, June 10, 2015

माझ्या "ब्राम्हण" मैत्रिणीस

माझ्या "ब्राम्हण" मैत्रिणीस
तू स्त्री असूनदेखील शोषितांचं दु:ख समजू शकत नाहीस
ह्याचं आश्चर्य वाटतं सारखं
तुला स्वैपाकघरात कोंडून ठेवलेलं
मला जातीव्यवस्थेच्या तळाशी
परंपरेने ज्ञानर्जनाचे मार्ग ना तुला खुले होते ना मला
जानवं घालायचा अधिकार ना तुला न मला
मान वर करुन, डोळ्यास डोळा भिडवून बोलण्याचा अधिकार
ना तुला न मला
आपली पायरी ओळखून वागण्याचा जन्मजात मिळालेला शाप
तुझ्यामाझ्या शरिराचे विटाळही ठरलेलेच

इतकं सगळं असूनसुध्दा
"ब्राम्हणांनी तुमचं काय घोडं मारलंय रे?"
हे विचारताना तुझ्या लक्षात हे कसं येत नाही
कि घोडे पाळायचा आणि उधळायचा अधिकार
ह्या व्यवस्थेने तुला काय मला, सारखाच नाकारलाय

तू स्त्री असूनदेखील शोषितांचं दु:ख समजू शकत नाहीस
ह्याचं आश्चर्य वाटतं सारखं

-कौस्तुभ

Sunday, October 5, 2014

कश्मीर

काही रिकामी घरं
काही ओसाड गाव
एक दरी रोज पेट घेते
कश्मीर तिचं नाव

दऱ्यांत घुमतो आक्रोश
बर्फ़ात साकळताना रक्त
बंदूका ग्रेनेड धडाडू लागतात
आपण बातम्या पाहतो फ़क्त

कुणाचे राजकीय चोचले
कुणाचे राष्ट्रवादी अहंकार
झेलमच्या गर्भात उठलेला
कधी थांबेल हा संहार?

हातात मुलाचा फ़ोटो
चेहऱ्यावर हरवलेला भाव
एक आई दररोज घेउ पाहतेय
हरवलेल्या अर्भकांचा ठाव